Türkün Dili

Türkün Dili

Türkün dilitək sevgili, istəkli dil olmaz
Özgə dilə qatsan, bu əsil dil, əsil olmaz

Öz şe’rini Farsa- Ərəbə qatmasa şair
Şe’ri oxuyanlar, eşidənlər, kəsil olmaz

Fars şairi çox sözlərini bizdən aparmış
“Sabir” kimi bir süfrəli şair, pəxil olmaz

Türkün məsəli, folkoloru dünyada təkdir
Xan yorqanı, kənd içrə məsəldir, mitil olmaz

Pişmiş kimi, şerin də gərək dad-duzu olsun
Kənd əhli bilərlər ki doşabsız xəşil olmaz

Sözlər də cəvahir kimidir, əsli bədəldən,
Təşxis verən olsa, bu qədər zir- zibil olmaz

Şair ola bilməzsən, anan doğmasa şair
Missən a’ balam, hər sarı köynək qızıl olmaz

Çox qıssa boy olsan, olusan cin kimi şeytan
Çox da uzun olma ki, uzunda ağıl olmaz

Məndən də nə zalım çıxar oğlum, nə qisasçı
Bir dəfə bunu qan ki, ipəkdən qəzil olmaz

Azad qoy oğul eşqı, təbiətdə bulunsun
Dağ- daşda doğulmuş dəli ceyran həmil olmaz

İnsan odu tutsun bu zəlil xalqın əlindən
Allahı sevərsən, belə insan zəlil olmaz

Çox da ki Sərabin suyu var, yağ- balı vardır
Baş ərşə də çatdırsa, Sərab, Ərdəbil olmaz